Baiona ttipiko ostatu-leize batean elkartu ziren, burbuilarik gabeko kalimotxo pare baten inguruan, euskal rock musika nardagarriaren erdian.
- Noizbehinka irakurtzen dizkiat azken orriko hire artikulu horiek ; batzuetan arrazoi duk. Horrek ez du erran nahi besteak baino habilago haizenik... Egurra denei banatzen diek, horretan aditua haiz ! Eta hitaz zer? Ez al duk ezer aitortzeko ?
- Zeeer ?
- Nik aterako dizkiat konduak : bla bla blaka aritzeak ez dik gorotza urre bihurtzen. Hire borroka pertsonalak atxikazkik hiretako, besteak unatzen ibili ordez. Astoak bere burua lauda !
- Eeee...
- Erranen diat : hi, ikastolako kafira abertzale beroetan hezi haute, urrunetik ageri dik. Ez duk zaila oskoletik justiziaren eta euskararen eta independentziaren alde egotea, joan hadi errugbi partida batera eta hor ikusiko duk benetan zertan den euskal jendea. Ala ez dituk inoiz oinak zelaietan ezarri? Horren kontra ere baduk zerbait ? Hire eguzki sisteman dibagatzen ari haiz eta beste planetak ez dituk somatzen ere. Eta gero jendartea astindu nahi ? Ametsetan sinesteak bizi osoan lotan utziko hau.
- Baaaa...
- Masa borrokaren kontzeptua ez duk ongi sesitzen, beti egon haiz biharamunik gabeko kanpaina erradikaletan itzuli mitzulika. Hori bai, politikaz aho bete mintzo baina ez haugu alderdietan ikusten. Zer nahi duk ? Sugeak saskitik besteen eskuekin atera ?
- Mmmm...
- So ezak : goizeko hamarretan altxatzen haiz eta egunsentia dela uste duk. Kutsaduraren aurka omen eta hegazkinetan egiten dituk hire bidai exotiko delakoak. Itxuraz erretzeari uzi diok eta ondokoei zigarretak beti lapurtzen. Medikuntzaz ez dakik tutik ere eta konbentzionala den guztiari irainka. Horrela ez duk mundua aldatuko, ganorabako galanta...
- Grrrr...
- Hara ! Mintzen hasia ? Hago hago, ez diat bukatu. Argitaratzen ditukan liburuak hiru katuk irakurtzen dizkik, hutsez josiak daude eta hire denda horretan ez duk inoiz nehor agertzen. Euriaz babesten duten teilak eguraldi ona delarik xukatzen ezarri behar dituk, tetele !
- Fiuuu...
- Ez hadila kesa, hire onerako ari nauk, maite duenak ongi zigortzen dik. Badakik zer ? Mexikar bati entzun nioan mende bakoitzak bere iraultza berria dakarrela, XXIgarren mendekoa ongi hasia dugula. Ez zakala etsi ! Egun handiaren zain hagoen bitartean, lagunarteko kontseilua emanen diat : jardun malgutasunean eta irmoa bilakatuko haiz, ahulezian bada ere egin lan eta azkarra izanen haiz. Ez diat deus gehiago gaineratzeko. Beste kalimotxo bat?
- Urrup !