Alderantziz dabil mundua. Etorkizun zuzenagoaren alde ari denari zaio beti zigorra erortzen.

Lasai bizitzeko, ezkertiar militante inozoak ez gara funtsezko zerbaitetaz jabetu. Justiziarekin arazorik ez ukaiteko, ez genituen iharduera egokiak hautatu. Mertzenariei ez diegu armarik saldu. Droga trafikoaren irabaziak ez ditugu kasinoetan eta prostituzio sareetan inbertitzen. Faboreen truke ez dugu inongo epailerik, poliziarik, enpresabururik erosi. Espekulazioaz, gainbalioaz, deslokalizazioetaz deus gutxi dakigu. Paradisu fiskaletan ez dugu dirua garbitzeko kondu anonimorik ireki. Oroz gainetik, ez gara aberatsak eta lortu etekin meheak ez ditugu patrikaratzen. Jokoz kanpo gaude.

Jakina, gaiztoak gu gara. Kulturaz eta politikaz mintzo diren liburuak publikatzen ditugu, eta guri digute banketxeko kondua blokatzen. Gure argitaletxeko kide batek bertan prokurazioa duelako, ezker abertzaleko alderdi batean lan egiten baitu. Pariseko epaile baten nahietara gaude, Madrileko beste batek galdeginik. Ez gu bakarrik. Beste hamaika familia eta elkarte ere.

Haserre gaude baina ez harrituak. Zigor ekonomikoa errepresio zabalagoaren adar bat gehiago da. Kartzela, tortura, legez kanporatzea, egunkarien itxiera enbor berdinetik datoz. Zanpaketa guztiek, handiek eta txikiek, ondorio kolateralak dituzte. Banku konduen blokatze azken operazioak Gatuzain izorratu du, ezin dugu normalki gure dirua erabili. Nor hurrengoa ?

Legeak ez gaitu babesten, gure kontra egina dagoela dirudi gehienetan. Goiz edo berandu, galdera hau datorkigu burura : zertarako inplikatzen segitu, zaflakoak biltzeko ez bada ? Zertarako gauzak aldatzen saiatu, ezaxolagabekeria nagusi den jendarte honetan ? Gure argitaletxeak hamar urte bete berriak ditu eta zorionez dena ez da debaldetan izan. Euskal Herriaz deus ez dakien norbaitek liburu bati esker zerbait ikasi duela entzutean, munduko beste herrietaz gutxi dakien euskaldunak beste liburu batean zerbait interesgarri irakurri duela jakitean, aintzina jarraitzeko arrazoinak metatzen zaizkigu. Galtzen den borroka bakarra bertan behera uzten dena da, diote Argentinako Maiatzeko plazako amek.

Trabak traba, liburuak eginen ditugu, lanbide baliagarri hau ez dugu baztertuko. Zuen sustengua ere beharko dugu horretarako, normaltasunez arizan gaitezen, askatasunean. Ez gara bakarrak. Konduak blokatu dizkieten beste jende guziekin batera, ekainaren 14an iraganen den manifestaldian parte hartzeko gomita luzatzen dizugu, mespretxuari elkartasunez erantzuteko. Bihar nehor gehiago zanpa ez dezaten.