Jolaserako sei proposamen berri Ikastolen Elkartetik
Ikastolen Elkartearen joko eta jolas didaktikoen altxorra urtetik urtera hazten ari da, Euskaraz jolastu, euskaraz bizi proiektuaren altzoan. Urtero legez, Eguberri bezperak baliatu ditu elkarteko Jokogintza Sailak bere uzta berria aurkezteko. Sei alek osaturiko uzta, Olentzerok ere kontuan hartzeko modukoa.
Euskaraz jolastu, euskaraz bizi
1991-1992 ikasturtean abiatu zen egitasmo ausart hau. Proiektu honen helburua gure herri tradizioan oinarritutako baliabide didaktikoak eta ohiko joko didaktikoak euskaraz garatzea da, ikastolei beren Hezkuntza Proiektua eta Curriculum Proiektua garatzen laguntzeko. Lan honen lehenengo fruituak Olentzero pertsonaiari lotutako materialak izan ziren. Gaur egun hezkuntza-joko ugari ditugu katalogoan. Olentzero bilduma eta beste material didaktiko osagarri batzuk osatzen dute gure bilduma.
Joko didaktikoak baliabide pedagogiko garrantzitsua dira hezkuntzan. Bi eremutan eragiten dute. Batetik, adin bakoitzari dagozkion gaitasun orokorrak garatzen laguntzen dute (hautematea, aditasuna, oroimena, pentsamendu logikoa...). Eta bestetik, curriculum proiektuarekin izaten dute lotura irakasmaila bakoitzean erabiltzen diren jokoek. Honela, kontzeptuak eta prozedurak lantzeaz gain, baloreak ere transmititzen dira, edozein baliabide didaktikotan legez, eta guretzat oso garrantzitsua da euskal curriculumeko gaiak ezagutzera ematea eta euskal kulturarekiko balore positiboak erakustea.
Ezin da ahaztu jolasteak, berez, ikuspegi ludiko hutsetik ere bere onurak dituela. Eta hizkuntza gutxitu baten normalkuntzaren ikuspegitik, oraindik garrantzitsuagoa bihurtzen dela hizkuntza horretan jolastea, euskaraz jolastea, guri dagokigunez. Euskarak neska-mutilen aisian sartu beharra dauka. Gure egitasmo honek, bere neurrian, helburu hau betetzen lagundu nahi du.
Katalogoaren berrikuntzak
Ikastolen Elkarteko katalogoa urtez urte ari gara osatzen, gure helburua katalogo osoa eta aberatsa izatea baita, adin guztietako pertsonentzat, jaioberri eta helduontzat, eta ahalik eta euskarri mota gehien hartuaz, euskaldunok ere jolasteko besteak beste aukera izan dezagun!
|
