Jose Luis AIZPURU
Petzero
Zartakoa
Pasa den asteko zartakoa gorputzetik kendu ezinik ari naiz. ETA erakundeak menia bertan behera utzi du, eta beraz, "fronte guztiak" irekitzen ditu. Ez dakit argi zoin diren fronteak, edo nortzuk diren barnean: poliziak, epaileak, presondegietako funtzionarioak, alderdi sozialista eta popularreko hautetsiak, kazetariak, prokuradoreakŠ
Birkatzainak
Kazeta bateko publizitatea irakurri dut: bizkartzainak xekatzen ditu Madrileko sekuritate enpresa batek. Ulertzekoa da. Pasa den astetik goiti, tira ahala bizkartzain behar baitira, "fronteetako" kideak babesteko. Denak ere berdintsuak dira: gazteak, luneta beltzekin, ezker-eskuinera so, eta beti, norbaiten gibeletik. Ez naiz hasiko sufrimenduen konparaketa egiten, baina, goizetik arrats, bi jende zure gibelean senditzea, gau eta egun, ez dut uste egoera gozoa denik.
Kazetetan bazka
Negoziazioa-elkarrizketa hautsi da, edo hautsi zen; ez dakit noiz. Gehienok ez baitakigu ezer. Ez dakigu funtsean, zer arraio gertatu den. Solasean izan den alde bakoitzak badu bere bertsioa. Eta justuki, kazetetan irakurtzen ari gara zer gertatu omen zen. Solaskide bakoitzak bere korda edo lerroko kazetari filtratzen baitizkio negoziaketaren nondik norakoak, kutzukeriak, eta elkarrizketen bilanak, beren porrotaren justifikazio gisara.
Nafarroa
Bi aldeetako kazetak irakurtu ditut. Untsalaz Nafarroa izan da hausturaren gakoa. Batzuen irudiko Nafarroak egun duen estatus juridiko-politikoa ez da aldatu behar. Dagoen moduan ongi da. Besteen ustez Hegoaldeko lau probintziek autonomia bakar baterantz jo beharko lukete, eta erreferendum bateratu bat antolatu, ez sobera berant. (Su-etenaren hausturaren lehen ondorioa gertatu da Nafarroan: Iruneko herriko etxeko auzapeza eskuineko izanen da berriro).
Hirugarrenekotz huts
Hiru negoziaketa aldi nagusi izan dira 1989tik hona Espainiako gobernua eta ETAren artean: Algerrekoa, Lizarra-Garaziko sasoinean eman zena, eta, berrikitan, hautsi dena. Azkeneko hau berezia izan da, Anoetako proposamenaren arabera, ETAk etzuen gai politikoetaz solastatu behar Zapateroren gobernuarekin; hori alderdi politikoen egin beharra izanen zen. Beldur naiz negoziatze ahalmena ez ote den gero eta murritzagoa ezker abertzalearentzat: Estatuak gero eta indartsuagoak, erakunde armatua gero eta ahulagoa. Indar kondua baita, maleruski, negoziaketaren funtsa.
Akzio-erreakzio
Arnaldo Otegi presondegian sartu dute. De Juanak berbidea hartu du. Larunbatean herriko etxeak osatuko dira, eta ANVko hainbat bozkazalek ez dute ordezkaritzarik izanen. Bere aldetik Espainiako Alderdi sozialista hasi da heldu den urteko hauteskunde presidentzialak prestatzen. Mezua argi dute : Œentseatu gira, baina ez dugu ardietsi. Sinets gaitzazue. Orain errepresioa da bidea’.
Ez dakit noizbait benetan izan duten aitzina egiteko borondaterik. Nor ote da petzero?
|
