Enpresetan euskararen erabilera ebaluatzeko kalitate ziurtagiria ez da Bai Euskarari ziurtagiriaren "bikoizketa". Horixe adierazi dute Eusko Jaurlaritzaren Hizkuntza Politikarako Sailburuordetzatik, Kontseiluak egindako adierazpenei erantzunez. Hizkuntza Politikarako Sailburuordetzak adierazi du Eusko Jaurlaritzak urteak daramatzala lan munduan euskararen "erabilera sustatzen", eta legealdi honetarako berau duela "lehentasunik handienetako bat". Euskararen erabilera ebaluatzeko ziurtagiria dela-eta Kontseiluak esandakoari dagokionez, Sailburuordetzak esan du kaleratzear duen enpresetan euskararen erabilera ebaluatzeko kalitate ziurtagiria ez dela Kontseiluaren Bai Euskarari ziurtagiriaren "bikoizketa", bata eta bestea "desberdinak" direla.

Sailburuordetzak gaineratu du bere jarduna ez doala "ez inoren ez ezeren aurka", euskararen alde bakarrik baizik. Hizkuntza Politikarako Sailburuordetzak, beraz, ez du lehendik "existitzen zen tresnarik martxan jarriko" eta ez du ezer "bikoiztuko".

Aspaldi hasitako lana

Enpresetan euskararen erabilera bultzatzea denez Hizkuntza Politikarako Sailburuordetzarentzat legealdi honetako lehentasun nagusietarikoa, aipatu du ekimen integrala sortu eta jarri duela martxan gainerako herri erakundeekin batera: LanHitz izeneko programa marko orokorra.

Hizkuntza Politikarako Sailburuordetzak nabarmendu du "deigarria eta tamalgarria" dela Jaurlaritzak euskararen aldeko neurri bat hartzen duen bakoitzean, batzuek, poztu ordez, "bere kritika eta urduritasuna azaltzea". "Egiten ez dugunean egiten ez dugulako, eta egiten dugunean egiten dugulako, baina batzuentzat ezinezkoa dirudi herri-erakundeek euskararen arloan bikain ezer egitea".