Dudarik gabe asko kezkatuak izanen dira azken denboretan prefetak hartu neurriekin, izan dadila Batera diruz lagundu dituzten auzapezen aurkako epaiketengatik edo berrikitan Laborantxa Ganbararen laguntzaileenganako mehatxuarengatik. Ondorio larriak izan daitezkela kontuan hartuz ere, ezin da ukatu gutxienez errepublika frantses handi eta bakarraren egiazko aurpegia erakusten duela prefetak.

Ipar Euskal Herrian orain arte bizi izan dugun errepresioa mespretxu demokratikoaren itzalpean egin da. Alde batetik diru laguntzak ukatzean, batez ere irakaskuntzan eta kulturan, gure kultura heriotzera eraman nahi izan dute. Bestaldetik, itzalpean, polizia espainolekin batera abertzaleak kriminalizatzen dihardute, autodeterminazio eskubidea betiko urkatu nahian. Baina kanpotik ikusirik Espainia baino "demokratikoago" zirudien, kolaborazio faxistak, torturak etabarrak ez baitira tokiko egunkari frantsesetan maiz agertzen. Nork sinetsiko dio ordea Parisek demokratikoa dela dionean, euskal herritarren auzietan euskara "terrorismoari" lotzen badu?

Gutxienez orain, inoiz baino gehiago, Frantziaren jokoa agerian gelditu da. Euskara delitua bilakatua da Pariseko auzitegietan, baina Euskal Herrian OPE (Euskararen Erakunde Publikoa) sortu da. Sinetsi behar dugu euskara zikintzen eta hiltzen duen estatu batek, gure hizkuntza sustatzeko erakunde pribatua sortu duela ?

Laborariek sinetsi behar dute SUATak Laborantxa Ganbararen lana eginen duela, dituen 17 aulkietatik 5 baizik ez direlarik ELBrenak ? Hola segituz gero, Frantziako agintariek lortuko duten gauza bakarra Euskal Herriko erresistentziari zilegitasun gehiago ematea da.